為凖備18/19 N班學期（即幼兒預備班），1.5歲嘅juju已經經歷左人生第一次面試，首間學校係名牌國際學校，面試期比較早（local school通常喺12月、1月進行N班面試，有幾間心儀學校仲未開始報名），今次係放平常心比阿仔感受吓陌生環境同面孔有咩反應，順便比我地新手爸媽知道幼稚園入學面試係咩一會事。
而新手媽媽亦想好好紀錄BB每個成長check point，育兒理念係多思維嘅，以下分享只屬個人感受！
N同K面試好唔同（始終in K小朋友面試時都有2-2.5歲），in N嘅老師要求相對地較寛鬆，尤其國際幼稚園，會響遊戲同任務中比分數，等家長同小朋友都無咁大壓力。
入正題喇，當日流程如下：
- 面試時間9:30am，一去到學校門口就見到兩位笑面迎人嘅老師同我地say hi，juju果刻好怕羞，唔肯入校門，呢個時候要抱佢入去。
- 家長入去登記同貼label，旁邊有個playground放左D馬仔、波波，可以比小朋友熱下身。
- 當段時間有20個小朋友面試，我地按老師分組，排隊等候做任務。
- 任務1:
20個小朋友同家長一組，玩彩虹傘，外籍英語老師叫家長同小朋友一齊搖彩虹傘，做出shake、up and down動作，再加入唔同顏色波波，邊玩邊教red ball、blue ball、green ball，呢個時候好多男仔小朋友都被波著迷，老師會叫大家番去原位再做shake、up、down，完成動作bye bye ball就叫大家圍圈坐櫈仔，等老師推個大波波比小朋友，做roll and roll back動作。
- 任務2:
老師安排大家排隊洗手，去下個任務整cup cake，大家分組坐5人一枱，國語老師出場教小朋友點做吱花、裝飾，之後輪到小朋友自己發揮創意、耐性同小肌肉動作，整好之後可以即場食或帶回家。
- 任務3:
大家圍圈聽外籍英語老師講故事（小朋友坐前面、家長坐後面），唱左3首歌同教小朋友動作（how are you song、the wheel on the bus、goodbye song)，故事中有動物公仔、有巴士呔盤比小朋友拎住一齊做動作，講到大象，叫小朋友排隊跟大象腳步step，講到兔仔，老師拎住隻公仔叫小朋友shake hand、hug me，最後竟然有隻真兔仔出現，叫小朋友輪住摸下郁緊嘅兔仔同睇佢地反應，之後唱goodbye song，老師逐一派禮物比小朋友，教佢地回應thank you。
三個任務過程大概60分鐘，都幾考小朋友耐性，經過今次第一次接觸interview，總括黎講有D似平時上playgroup咁，見到校長、老師們好有愛心，不段鼓勵小朋友，佢地唔會好表面咁「考」你小朋友，而係透過遊戲黎打分，不過遊戲時間都幾長（就好似上左日playgroup咁），小朋友要響短時間內認識新環境、老師、小朋友同做任務都唔簡單呢！
媽媽感想：
小朋友響面試遊戲時總會有D唔合作、未能好似平時咁發揮表現，小小人仔又點明白咩叫面試呢，佢地去到一個新環境、見到所有新面孔唔多唔少都要D時間適應，作為爸爸媽媽要加以鼓勵，千其唔好責怪佢地，我地可以「賽後檢討」，知道小朋友邊方面唔穏定，再慢慢教導。
已知面試結果，收到校長來信 "已經取錄"，其實無論面試結果點，爸爸媽媽已經覺得juju做得好好，去到臨走我要補交文件，佢就同老師so so，又攬又飛吻，睇黎好鐘意呢間學校呢！
有地方改進嗎？有，一定有，但我地唔係要求100分嘅聽指令機械人，而係透過觀察，了解小朋友性格，培養個人品德、同理心、領悟力，為小朋友選擇適合佢地嘅學院。
P.S. 無忘初衷，但願小朋友擁有快樂童年！
